Psa 40 | AmhNASV | STEP | 40፥13-17 ተጓ ምብ – መዝ 70፥1-5 ለመዘምራን አለቃ፤ የዳዊት መዝሙር። እግዚአብሔርን ደጅ ጠናሁት፤ እርሱም ዘንበል አለልኝ፤ ጩኸቴንም ሰማ።

Psalms 40

የምስጋናና የርዳታ ልመና ጸሎት

40፥13-17 ተጓ ምብ – መዝ 70፥1-5

ለመዘምራን አለቃ፤ የዳዊት መዝሙር።

1 እግዚአብሔርን ደጅ ጠናሁት፤
እርሱም ዘንበል አለልኝ፤ ጩኸቴንም ሰማ።
2 ከሚውጥ ጕድጓድ፣
ከሚያዘቅጥ ማጥ አወጣኝ፤
እግሮቼን በዐለት ላይ አቆመ፤
አካሄዴንም አጸና።
3 ለአምላካችን የሚሆን ውዳሴ፣
አዲስ ዝማሬን በአፌ ላይ አኖረ፤
ብዙዎች ያያሉ፤ ይፈራሉም፤
በእግዚአብሔር ይታመናሉ።

4 እግዚአብሔርን መታመኛው ያደረገ፣
ወደ ትዕቢተኞች የማይመለከት፣
የሐሰት አማልክትን ^{▼▼ወይም ሐሰትን ወደሚከተሉት ተብሎ መተርጐም ይችላል።} ወደሚከተሉት የማያይ
ሰው ብፁዕ ነው።
5 እግዚአብሔር አምላኬ ሆይ፤
አንተ ያደረግኸው ድንቅ ነገር ብዙ ነው፤
ለእኛ ያቀድኸውን፣
ሊዘረዝርልህ የሚችል ማንም የለም፤
ላውራው ልናገረው ብል፣
ስፍር ቍጥር አይኖረውም።

6 መሥዋዕትንና ቊርባንን አልፈለግህም፤
ጆሮዎቼን ግን ከፈትህ፤ ^{▼▼ዕብራይስጡ ከዚህ ጋር ይስማማል፤ የሰብዓ ሊቃናት ትርጕም ግን፣ አካልን ግን አዘጋጀህልኝ ይላል።}
የሚቃጠል መሥዋዕትን፣
የኀጢአትንም መሥዋዕት አልሻህም።
7 እኔም እንዲህ አልሁ፤ “እነሆ፤ መጥቻለሁ፤
ስለ እኔ በመጽሐፍ ተጽፏል፤
8 አምላኬ ሆይ፤ ፈቃድህን ላደርግ እሻለሁ፤
ሕግህም በልቤ ውስጥ አለ።”
9 በታላቅ ጉባኤ ውስጥ ጽድቅን አበሠርሁ፤
እግዚአብሔር ሆይ፤ አንተ እንደምታውቀው፣
ከንፈሮቼን አልገጠምሁም።
10 ጽድቅህን በልቤ አልሸሸግሁም፤
ታማኝነትህንና ማዳንህን እናገራለሁ፤
ምሕረትህንና እውነትህን፣
ከታላቅ ጉባኤ አልደበቅሁም።

11 እግዚአብሔር ሆይ፤ ምሕረትህን አትንፈገኝ፤
ቸርነትህና እውነትህ ዘወትር ይጠብቁኝ፤
12 ስፍር ቍጥር የሌለው ክፋት ከብቦኛልና፤
የኀጢአቴ ብዛት ስለ ያዘኝ ማየት ተስኖኛል፤
ከራሴ ጠጕር ይልቅ በዝቷል፤
ልቤም ከድቶኛል።

13 እግዚአብሔር ሆይ፤ ታድነኝ ዘንድ ፈቃድህ ይሁን፤
እግዚአብሔር ሆይ፤ እኔን ለመርዳት ፍጠን።
14 ነፍሴን ለመንጠቅ የሚፈልጉ
ይፈሩ፤ ይዋረዱም፤
ጕዳቴንም የሚሹ፣
ተዋርደው በመጡበት ይመለሱ።
15 በእኔ ላይ፣ “ዕሠይ! ዕሠይ!” የሚሉ፣
በራሳቸው ዕፍረት ይደንግጡ።
16 አንተን የሚፈልጉ ሁሉ ግን፣
ሐሤት ያድርጉ፤ በአንተም ደስ ይበላቸው፤
ዘወትር የአንተን ማዳን የሚወድዱ፣
“እግዚአብሔር ከፍ ከፍ ይበል” ይበሉ።

17 እኔ ድኻና ችግረኛ ነኝ፤
ጌታ ግን ያስብልኛል።
አንተ ረዳቴና አዳኜ ነህ፤
አምላኬ ሆይ፤ አትዘግይ።